عندي كلام كتير بس مبقدرش اتكلم انا مين اثارت هذه الكلمات حزن الكثير في التعرف على قصة شاب قرر ان يتحدث ويقول قصته التي آلمت به لفترة طويلة جدا من الزمن حيث يقول فيها تفاصيل حياته والتي بدأها في عدم معرفة البداية التي سيقولها عن حياته وقصته التي حزن الكثير عند سماعها.
قصة عندي كلام كتير بس مبقدرش اتكلم انا مين
فبدأ قائل القصة بـ اولا : انا مش عارف ابدأ منين بس انا جوايا كلام كتير جدا وطاقه سلبيه بطريقه رهيه ‘ مش عارف فيا ايه ‘ متلخبط جدا ‘ مبقتش اعرف اخد قرار ‘ وف ناس كتير كلمتني ليه مبقتش اهتم بالاكونت زي الاول والمنشورات اللي كانت بتنزل ‘ السبب هو اني مبقتش حابب أتكلم ولا حابب ادخل ف نقاش مع حد ‘ مبقتش حابب شخصيتي أصلا ‘ عندي اكتئاب بطريقه فظيعه ‘ انا اعرف ناس كتير جدا ‘ وناس كتير تعرفني ‘ بس للاسف ماليش صحاب ‘ كلهم اشكال ‘ ممكن يكون ليا شخصين او تلاته بالكتير ‘ انما الباقي اشكال وبس ‘ ديما بلاقي غدر من الناس وبلاقي رد المعروف بإساءه ‘ ومش بلاقي حد يقف جني ‘ ديما بقعد لوحدي وبعيط من غير سبب ‘ ديما بقعد ف اوضتي الضلمه اللي كانت عقاب ليا زمان ‘ دلوقتي بقت اكتر مكان بحب اقعد فيه ‘ حياتي متلخبطه جدا جدا ‘ مش عارف ليه ‘ ولا عارف السبب إيه هو ‘ مع اني مش وحش مع حد ‘ ديما بساعد اي حد بيطلب مني مساعده سواء ماديه معنويه اي ان كانت المساعده دي ‘ وديما لما بحتاج مساعده من حد مش بلاقي ‘ انا اغلب الوقت فاتح السوشيال بس مش بتكلم مع حد أبدا ‘ عندي ناس كتير علي الصفحة وبرغم كل ده معنديش صديق مقرب ‘ بيبقي نفسي ادخل لاي حد واقعد اتكلم بس مش بلاقي للأسف ‘ بيبقي نفسي ألاقي حد اتكلم معاه واقعد اعيط واصرخ واعمل كل شيء يريحني بس للاسف مش بلاقي ‘ مع ان اللي بيحتاج حاجه بكون اول واحد جنبه ‘ ماليش صحاب خالص ‘ نفسي يكون ليا صاحب ع الاقل اتكلم معاه ويستحملني بس للاسف مفيش ‘ تقريبا كده مفيش حد قالي انا هفضل معاك وكمل للآخر ديما بيمشوا ومش بيفضلوا ‘ انا انسان وبني ادم زي جميع الناس عندي مشاعر وعندي مشاكل وبحتاج حد يقف جنبي بردو بس مش بلاقي ‘ علطول بختصر حالي لما حد بيسأل عني وبقول الحمد لله تمام ‘ مع ان خلف الكلمه دي كلام كتييييير نفسي اطلعه ‘ زمان كنت بحكي لامي كل شيء وكنت احضنها واعيط ‘ دلوقتي مبقدرش اعمل كده مبقتش احب اوجعها عليا ‘ اهلي ديما بيشوفوني بضحك مع العلم اني بعيط وبتعذب من جوه ‘ شوفت غدر كتير من الناس ومبقاش عندي طاقة اجادل حد اصلا ‘ لما حد بيغلط فيا بقوله تشكر ‘ مش ضعف مني بس انا تعبان مش قادر ادخل ف نقاش مع حد ولا قادر اتكلم ‘ ديما بهزر واضحك واي حد يعرفني شخصيا عارف بكده ‘ مش بحب اظهر ضعفي للناس ولا لاي شخص مهما كان مين ‘ زمان حكيت لواحد عن حالي ‘ بعدها حصل خلاف بنا قعد يزلني باللي حكيته ليه ‘ عشان كده مش بتكلم مع حد ‘ اقسم بالله بقيت اخاف احسن حد يبعتلي اي مسدج يسألني فيها عن حالي ‘ خايف جدا ‘ وبقيت متلخبط ومش فاهم ومش بقدر اخد اي قرار ‘ ف ناس هتقول ‘ انت بتنزل بوستات تشجع وهكذا ومش بتفكر ف نفسك يعني فاقد الشيء لا يعطيه ‘ انا اه فاقد ولكن بعطي لأني مش عاوز حد يوصل للمرحله اللي وصلتلها ‘ انا شخص كئيب جدا ‘ نكدي جدا ‘ مش بقعد مع حد ‘ متوحد ‘ ماليش صحاب ‘ ماليش حد ف الأساس ‘ مع اني مكنتش كده بس اللي حصلي خلاني كده ‘ انا اول مره أتكلم عن حاجة زي دي للناس جميعاً ‘ بس بجد اللي خلاني اعمل كده اني تعبت والله تعبت جدا ‘ تعبت من قعدتي بالساعات مع الروايات والوحده والقهوه والصداع الدايم تعبت من حاجات كتير ‘ تعبت من نفسي أصلا ‘ تعبت من كل شيء ‘ مش عارف السبب ولا لاقي حل للموضوع ده ‘ بيبقي نفسي اروح مكان فاضي واقعد اصرخ واعيط لحد ما اطلع كل الطاقه السلبيه اللي جوايا دي ‘ اللي معرفش جات منين اصلا ‘ انا كده تقريبا قولت جزء من اللي جوايا ‘ وللأسف في كلام كتير جوايا بس مش عارف اطلعه..
بتمني مكنش طولت عليكم ‘ بس للاسف ماليش حد غيركم اقدر أقوله الكلام ده ‘ وبتمني من الله ان محدش يوصل للمرحله بتاعتي دي ‘ دمتم في سعاده وخير دايما…
