قصة قصيرة السبب الرئيسي في انقراض الديناصورات..
قبل حوالي خمسمائة عام كان هناك ديناصورة وديناصور،، وهما اخر من تبقى من عائلة الديناصورات..وكان العلاقة بينهم مش تمام..يعني كان الديناصورة مشعبه شوية..
المهم في يوم من الأيام اتغدى الديناصور حنيذ، وبعدا رجع للبيت وأموره سابره..
صيح للديناصورة وقال لها هيا ندخل الغرفه نرقد..الديناصورة دعممت، وقالت مش فاضية لك!!
الديناصور غضب وغضب..وبعدا حنق..ودقها حرام وطلاق مايزيد يلمسها..ومرت الأيام وكل واحد مدعمم من الثاني..وفي الأخير..بعد حوالي شهر.. قرر الديناصور يطلق الديناصورة، وطلقها ثلاث طلقات..ثنتين في ارجيلها وواحدة في راسها..
والديناصورة روحت بيت ابوها ووصلت وقدوه فاضي!! لأن أبوها واخوتها قد انقرضوا زمان !!
المهم الديناصور قرر يتزوج بديناصورة ثانية علاسب يقرح قلب مرته الأوله..لاكن للأسف دور لاما شبع ولا حصل ديناصورة!!
مابلا جلس عزوبي ومرته جلست مطلقه لاما شيبوا وماتوا ولاحد رضى يتنازل منهم للثاني..وهكذا انقرضوا..
العبرة من القصة ان بعض البنات ترفض اكثر من شاب يتقدم لها وفي الاخير تجلس معنسه، والشاب يجلس عزب ويتعقد!! يعني بعد فترة عننقرض وانا اذكركم..
قبل شوية رسلت القصة لأبي بالواتس اب..قراها وقال خلاص نسير بالعشي نخطب لك بنت الجيران علاسب لاننقرض!
قلت له : انت داري ياباه؟ خلنا ننقرض احسن!!
#ذماري_نزغة